I. Umumiy qoidalar
O`zbekiston milliy teleradiokompaniyasining
«MTRK SOVRINI» uchun an’anaviy ko`rik-tanlovini o`tkazish
NIZOMI
I. Umumiy qoidalar
1. Mazkur Nizom O`zbekiston milliy teleradiokompaniyasi (keyingi o`rinlarda Kompaniya deb yuritiladi) tomonidan tele, radio sohasidagi ijodkorlar o`rtasida «MTRK SOVRINI» uchun an’anaviy ko`rik-tanlovini tashkil etish va o`tkazish tartibini belgilaydi.
2. «MTRK SOVRINI» uchun an’anaviy ko`rik-tanlovini (keyingi o`rinlarda Tanlov deb yuritiladi) tashkil qilish va o`tkazish Kompaniya raisining o`rinbosarlari, markaziy apparati bo`lim va bo`linmalari, Birlashgan kasaba uyushma qo`mitasi va tele, radio sohasida faoliyat yuritayotgan korxonalar rahbarlari hamda vakillaridan iborat tarkibda tuziladigan va Kompaniya buyrug'i bilan tasdiqlanadigan «MTRK SOVRINI» uchun an’anaviy ko`rik-tanlovini o`tkazish Tashkiliy qo`mitasi tomonidan amalga oshiriladi.
3. Tanlov an’anaviy va ochiq bo`lib, saralash va yakuniy bosqichlarda o`tkaziladi. Unda Kompaniya tizimida hamda tele, radio sohasida faoliyat yuritayotgan barcha korxonalar ijodkorlari ham o`z ijodiy ishlari bilan ishtirok etadilar.
Tanlovga muntazam efirga uzatib kelinayotgan va o`tgan bir yil davomida (yil boshidan yil oxirigacha bo`lgan davrda) tayyorlangan va efirga uzatilgan ijodiy ishlar qabul qilinadi.
Taqdim etiladigan ijodiy ishlar ko`rik-tanlov nominatsiyalaridan biriga mos kelishi va efir talablariga to`liq javob berishi shart.
4. Tanlov bilan bog'liq barcha malumotlar Kompaniyaning «Sado» gazetasida va www.mtrk.uz elektron saytida elon qilib boriladi.
5. Tanlov g'oliblariga mukofotlar 27 iyun - Matbuot va ommaviy axborot vositalari xodimlari kuni bayrami arafasida tantanali tarzda topshiriladi.
6. Tanlov nominatsiyalarida yuqori baholangan ijodiy ishlar tegishliligi bo`yicha o`rnatilgan tartibda Kompaniya «Arxiv fondi»ga qabul qilishga, muvofiqligidan kelib chiqib mustaqil teleradiokanallar va hududiy bo`linmalar efirida namoyish etilishiga hamda ijodiy ishlab-chiqarish faoliyatida foydalanishga tavsiya qilinishi mumkin.
7. Tanlovga taqdim etilgan ijodiy ishlar qaytarib berilmaydi.
Tanlov tashkilotchilari ulardan muallifning ruxsatisiz notijorat maqsadlarda (tanlovning reklama va ijtimoiy roliklarini tayyorlashda, keyinchalik efirga berish, arxivda saqlash uchun) foydalanish huquqiga ega bo`ladi.
